kanana

حبيباتي انا عضوة جديدة صار لي فترة أتابع لكن توني بديت اشارك معاكم ان شاءالله تعجبكم مشاركاتي و تتفاعلون معاي


طبعا موضوعي يمكن ما يكون جديد لكن أول مرة ينطرح هني و انا كتبته بقصد الفضفضة عن صديقاتنا

اكييد كل وحدة عندها عدد من الصديقات اللي تعزهم و يعزونها و بعضهم ما عليهم كلاااام بلسم و وقت الفرح و الضيق تعرفين قيمتهم و البعض قد ما تكونين خير صديقة لهم يطعنونج في الظهر و ل ايقدرونج واول ما تطبين يكونون هم اول من يشمت فيييج و اذا احتجتي وقفتهم يمرون ما كانهم يعرفونج في يووم
و غيير عن ربع المصلحة اللي ما فيه أحللى منهم وقت حاجتهم و من تنتهي هالمصلحة اللي بينج و بينهم ينسوووونج و ينسوون انهم في لحظة اعرفووج

في هالصفحة خل نفضفض و نتحجى و نطلع الي في قلبنا على هالنوع من الصديقات و كل وحدة تذكر مواقف لها و شلون تعاملت و شنو تصرفت

يلاااا بنات أنطر مشاركاتكم معاااي

ii DareeN ii

نكج كنانه وايد حلو وموضوعج احلى وايد مفيد حق بناتنا الي توهم بادين بالجامعه وبدايه الصداقات الي تكون قويه والبنات الي نقضي وياهم اليوم كله بهالوقت تلقين صديقات وايد يدقون عليج مو مره يقضون وياج اليوم بالجامعه ولا المعهد وباقي اليوم بالبيت تدق عليج بالساعات بس هذا مو معناه انها تكون تحبج لا مرينا كلنا بهالمره بس اول ماتطيحين بموقف ماتلقين احد للاسف وتنصدمين وينهم الي كنت اوديهم واييبهم بسيارتي ويدقون علي 24 ساعه معقوله وينهم هذيل الي يسمون بربع المصلحه وياكثرهم وياندر الاصدقاء الصجين الي يوقفون وياج موقف من مواقف وايد صادفتني ايام الجامعه كان عندي صديقات وايد وايد وكنت تقريبا الوحيده الي عندها موبايل هالحجي سنه 96وكنت اسوق الي تتكلم من تليفوني والي تبي تسوق سيارتي والي والي بس بيوم طحت انكسرت ريلي رجعت اشوف الي وياي كل يوم مايتصلون ولا اشوفهم بالكليه وينهم لايوجد احد طلو بويهي لايوجد احد كانو خايفين يدزوني بالويل شير ضل اقرب ثنتين لي الي المفروض ربعي مالقيتهم وقامو يتهربون مني اللهم يا كافي الي يقول حايشني عقنقز مايبون اعاديهم وماطلبت من احد يدزني وفي هذا الوقت كانت صديقتي كوين مسكينه تعاني وياي على الويل جير كل يوم تدزني وتمشيني بجنينه الكليه بعد والله ايام حلوه ويا كوين بالجامعه بس من وسط يمكن بنات وايد الي بقت وفيها خير هذي الفتاه هذي الشغله مانحس فيها بول حياتنا لان منشغلين ربع وناسه وطلعه بس نصيحه لاتتوقعين الي تجابلج بالجامعه طول اليوم صديقتج والي تقولج كشتي بمحاضرتج صديقتج نادر ترا بتلقين صداقه بهالوقت ودمتم

توقيع » ii DareeN ii

رسالة الي الغائب الحاضر في الاذهان سمو الامير الراحل عبدالله السالم الصباح

لا اقوم باي من اعمال الاداره ولا الاشراف حاليا في حال وجود اي شكوى يرجى التوجه لطاقم الادارة والاشراف او قسم الشكاوي والاقتراحات

وشكرا

kanana

هلا حبيبتي دارين نورتي موضوعي والله

تصدقين انا لي مثل انطباعج خصوصا عن ربع الجامعة تلقين ما شاالله ياكثرهم من ربع لكن حزة اللي تنتهي المصالح ما تلقينهم و و انا شفت هالنوع من الربع و للأسف ما نعرفهم الا لما ننقرص
منهم وانا اشوف ان هالفترة هي اللي الوحدة فينا تقدر تقيم صديقاتها لان راح تمر عليها نماذج كثيرة ....

و انا عن نفسي اخذت دروووس كثيرة من هالتجارب لاني وايد عرفت بنات بصراحة و بكل أسف ما يسووون ان احد يأمنهم على أسراره و لا حتى النصيحة لوجه الله تنفع معاهم و بعضهم كانت علاقتي معاهم جدا ممتازة و نعز بعض لدرجة كببيرة لكن الحسد ما يخلي بني آدم يصفي النيى مع الناس.......

انا بقول لكم هالموقف .........لي صديقة علاقتنا ببعض كانت وايد كلوز و انا لما دخلت الجامعة تعرفت على بنات وايد و قمت عرفتها عليهم طبعا ربعي الجدد ما حبوها وايد و لا حبوا اسلوبها لانها وايد تتكلف و باين انها قاعدة تجامل من غير نفسها و اللي صار عقب انها قامت تحن على راسي والله ديلين مال مصالح و مستغلين طيبتج و تفوقج و تعاونج معاهم...طبعا انا ما خذيت الكلام و تجاهلته و قعدت ابين لها ان علاقتي معاهم صح حق نتعاون في الدراسة لكنها قاعدة تقوى شوي شوي و فعلا كان هذا اللي يصير كنا نتعاون و في الوقت نفسه نقوي علاقتنا و هي ما كان عاجبها هالشي...مرت ايام الدبلوم وانا الحمدلله مجموعي كان يسمح لي أواصل بكالوريوس لكن هالصديقة لا و كاتنت نفسيتها تعبانة جدا و كنا نحاول نواسيها و الجامعة عطتها مهلة فصل دراسي عشان ترفع المعدل و في حال ما ارتفع ما راح تواصل الا عقب سنة..ما قدرت ترفع معدلها فاضطرت الجامعة تفصلها لمدة سنة و تقدمها لتنافس بعد سنة و في هالفترة هي قامت تدور على وظيفة و لقت لها و طبعا هالحجيي كله من غير ما تخبرنا عن شي و كانت تتهرب منا و فترة طويلة اكثر من شهر ما ندري عنها و عقب فترة اتصلت فيني من شغلها و قالت لي اشتغلت صار لي بس اسبوعين مع انها صار لها فترة اطول يمكن شهر حتى,,,انا ما اهتميت بصراحة و هي فيها هالطبع من زمان انها ما تحب تقول اخبارها و في الوقت نفسه تتقصى أخباري و أخبار باقي الربع المهم ان انا قبل بفترة خبرت البنات ان انا حابة ادور لي على وظيفة و بروح اوزع اوراقي على الشركات و البنوك و اللي حابة اقط اوراقها معاي خل تجهزهم طبعا هي اول وحدة جهزت اوراقها و عطتني اياهم و في نفس اليوم اللي رحت اوزع الاوراق اتصلت فيني و من غير كلمة شكرا تقول لي ويين وديتي الاوراق اي شركة و اي مكان و جم اللي وزعتي و جم اللي بقوا عندج؟؟؟ و قالت لي اووكيه جهزي اللي بقوا عندج بمر آخذهم و من غير كلمة شكرا و انا ما كنت انطر تشكرني لكن ما كنت اتوقع انها خايفة اوراقها اللي بقوا ما وزعتهم يتمون عندي.....و عقب طبعا هي راحت بروحها وزعت اوراقها و لقت وظيفة و ما درينا الا يوم توظفت عقب شهر!!!!!!!!


الشي اللي صار ان انا حاولت اتخرج قبل و الحمدلله تخرجت من الجامعة و تمت كل يوووم تتصل فيني ها اشسويتي ها شنو تتوقعين تتوظفين في وين ها دزيتي اوراقج ها وين نادوج حق مقابلة و كان هذا كله فضول في فضول يعني مو قلق اني ما اتوظف بالعكس فيه نوع الشماتة اني ما توظفت و تمت تتصل فيني بشكل شبه يومي بس عشان تعرف شنو اخر تطوراتي و اخباري و في نفس الوقت لما أسألها اي شي خاص فيها تتهرب........و اللي صاير الحين ان هي ممكن ان الجامعة تقبلها مجددا و لما سألتها آخر مرة تهربت من الموضوع ...
ليش يعني ابي افهم ليش انا وحدة تخرجت و كملت الحمدلله يعني ما راح أحسدها لانها بتواصل دراسة
الشي اللي صا ر ان انا عرفت نفسية هالبنية زين و خليت علاقتي فيها سطحية جدا جدا يعني بين فترة و فترة بكلمها و ما راح اخبرها اي شي عني الا بعد فترة يعني موب أول بأول مثل ما هي تبي .....

beauty

يعطيج العافيه عمري

موضوع حلووووو وفيه فايده

آنه صار لي موقف لما كنت في رابعه متوسط

تخيلي احنا قروب اربع بنات معاي من ثانيه متوسط بس وحده فيهم الي مو معانا في ثالثه ولما رحنا رابعه تمينا مع بعض بس كل وحده فينا بصف وحده فينا تقرب لي من بعيد وبينا مشاكل عائليه فما حبيت تكو علاقتي فيها قويه وودي انهيها بس مشكلتي حيل اهتم اني ما اجرح الاخرين وللاسف ع حسابي وتميت طول ال3 سنوات ساكته لما بطيت الجربه وقلت لوحده فيهم كنت اعتبرها قريبه وثاني يوم الي البنت تقولي انتي شقايله عني وعرفت انها موصله الكلام بالتفصيل الممل انهيت علاقتي فيهم ع طووووول والحمد لله اني كتومه ومو بسرعه اثق باحد ودايم اقول الحمد لله اني تعرضت لهذا الموقف وآنه صغيره عشان ما ادير بالي.......... وبسسسسسسس


اذا طرا علي موقف اكتبه لكم

توقيع » beauty

My Flickr

bnt_kwt

واااااااي كل موقف قلتيه صج يا كنانه
ياكثر ربع المصلحه وانا ياما وياما انقرصت منهم
اذا بغوا شي اصير عزيزه وغاليه
ومن تخلص حاجتهم ما يسألون عني
دايما افكر اقول ليش انا مو مثلهم
ليش انا احب الناس واحب اساعدهم واسأل عن الكل

ونيتي صافيه ما ابي منهم لا غرض ولا حاجه
والله اني انصدمت من وايد بنات ايام الثانويه وايام المعهد ومازلت اتلقى صدمااات
بس يالله كل وحده تسوي باصلها وتربيتها وعيال الحمايل اهم اللي يبين بعيونهم الخير

توقيع » bnt_kwt

اعتذر عن قله تواجدي بالمنتدى بسبب ظروف خاصه

kanana

بيوتي
مشكورة على مرورج و ننتظر موافقج

بنت الكويت

اهم شي نتعلم منهم و هالمواقف تفيدنا في المستقبل

beauty

bnt_kwt

ما عليج منهم مو معناته ان كل الناس ع صح خليج ع طبيتج اهيا الي بتنفعج يوم الحساب اما الخبث والمصالح مهما استفادوا منه فـ لهم نهايه

حياتي كنانه ان شاء الله بس اذكر شي اكتبه