كويتيات للطبخ

العودة   منتديات كويتيات النسائية > منتديات كويتيات الصحية > العمليات الجراحية

العمليات الجراحية قسم يختص بجميع مواضيع العمليات الجراحية وجراحات السمنة


إضافة رد
 
LinkBack أدوات الموضوع إبحث في الموضوع انواع عرض الموضوع
قديم 20-10-2013, 01:53:10 AM   #1
كــويــتــيــة بــرونــزيــة
 
تاريخ التسجيل: Jan 2011
الدولة: الأحساء - شرق السعودية
المشاركات: 587
افتراضي عمليتي (عملية تجميل الأنف) عند الدكتور أفشار - مشهد / إيران

بسم الله الرحمن الرحيم

اللهم صل على محمد وآل محمد

بنات هاذي تجربتي مع عملية تجميل الأنف
عند الدكتور أفشـار .. بإيران - مشهد

بالتفصيل الممل

أولاً: لمن وصلنا لمشهد

أتفقنا مع مترجم عربي
يتكلم لغتين عربية وفارسية ,,, أسمه سيد حسن
هاذي صورة المترجم



وهذا رقمه وعنوان عيادة الدكتور



دخلت على الدكتور أفشار مع أبوي والمترجم .. شاف الدكتور أنفي .. خبرني أيش أحتاج بالضبط (نحت العظم ,, ورفع الأنف .. وتصغير الأرنبه )
وقام يقول لي إن تكلفة العملية (7 مليون تومان)

سويت تحليل الدم .. ودفعت عربون للمستشفى (مليون تومان) ألف ريال سعودي

~~~~~~~~~~~~~~

وبشهر ذي الحجة ,,
كلمنا المترجم سيد حسن وطلبنا منه يحجز لنا موعد للعملية
(تاريخ 8 ذي الحجة) ..
وتم تحديد موعد العملية .. بيوم الأحد الظهر الساعه 1

وصلنا لمشهد بنفس يوم العملية .. بالفجر
وماقدرت أنــام .. لمن وصلنا الفندق أخذت حمام وغيرت ملابسي

طلعت صليت بحرم حفيــد الرسول صلى الله عليه وآله وسلم
الإمام علي بن موسى الرضا .. ودعيت ربي هناك إن عمليتي تنجح وإن الدكتور يكون شاطر

ورجعت للفندق وقلت بنام شوي
إلا أبوي يتصل علي .. ويقولي نزلي

قريبتنا الإيرانيه موجوده بالرسبشن.. وبتروح معانا للعيــاده

لبست عباتي ونزلت سلمت على قريبتنا وجلست معاها
على الساعه 11 أخذنا تكسي ورحنا لعيادة الدكتور

الدكتور ماكان موجود .. المترجم كان ينتظرنــا

أبوي سلمهم مبلغ العمليه .. بالإضافه إلى الجوازات (مطلوبه)
وجلسوا يرتبون الأوراق والإجراءات اللازمة ....

أنا جاني النوم من الإنتظار ,, طول الوقت جلست أصلي على رسول الله (اللهم صل على محمد وآل محمد ) وأدعي الله إن عمليتي تنجح ..

دخل وقت الصلاة
توضيت وصليت بالعياده ,,,
قعدنـا نسووولف ونحنا ننتظر المستشفى ينهون الإجراءات

ملاحظة:
بعد ما صارت أوراقي جاهزه ... قالوا يلا قومي بنروح المستشفى
عشان العمليه ,,,
(عيادة الدكتور بمكان .. والمستشفى إلي يسوي فيه العمليات بمكان)

ركبنا تكسي ورحنا للمستشفى ..
أنتظرنا عدة دقائق .. دخل أبوي وقع على الأوراق المطلوبة

وأخذوا مني بصمتــي .. وكتبت أسمي ووقعت جنبه (الموافقه على العملية)

قال المترجم .. خلاص الأوراق جاهزه ..
أصعدي فوق بدلي ملابسك للعمليه

صعدت .. عطتـني الممرضه ملابس العمليه .. لونها وردي
بنطلون طويل .. وقميص أكمامه طويله ,, وقبعه للشعر

وطلبت مني أشيل كل ملابسي .. حتى الداخليه ... وبعد العبايه أشيلها
وألبس (الشادور) العبايه الإيرانيه ,,
وإذا رحت غرفة العمليات أشيل الشادور ....

غيرت ملابسي .. ودخلت دورة المياه ... ولبست الشادور





ومشيت لين غرفة العمليــات وأنا مو مصدقه كأنه حلم .. لحظة الحماس والصفر ... ودخلت الغرفة ..
وأخيراً بعد كل هل إنتظار ,, بتجي اللحظه إلي انتظرها وبتتحقق

عمليتي يآآآآآآآآآآآآآآآآآآآآآآآآي ..
شفت الطاقم الطبي موجود بالغرفة .. دخل الدكتور أفشار وأبتسم يوم شافني
وصار يأشر على أنفه ويضحك (يقولي أنفك كبير) هههه
قرب مني وصار يطالع وجهي ويشوف خشمي من عدة زوايــا

بعدين جات الممرضه مع الممرض وعطوني أبرة .. وعقبها ماحسيت بشيء

((العملية مدتها أستغرقت ساعتين))


لمن صحيت من البنج (كان في ألم بخشمي) وكان مجبس

كنت عطشانه جداً ,,
وحلقي جــاف وفيه ألم (كأنه لوزاتي ملتهبين) يمكن لأن الجو تغير علي ,,
وماكنت أقدر أصبر دقيقه على العطش...أبي ماي على طول
كانت الممرضه واقفه بالغرفه ... قلت لها بصوت ضعيف لكنه مسموع أبي ماي ...
وأشرت لها بيدي (حركة شرب الماي) لأنها عجميه ويمكن ماتفهم كلامي ..
ماردت علي .. قلت لها أبي
وكررت عليها .. قالت ممنوع

شقد كانت هل كلمه قاسيه ,,
يعني تبي تفهمني إن مايصير أشرب ماي وممنوع

يمكن بحياتي كلها ماحسيت بعطش مثل ماحسيت فيه بذيك اللحظه
أنقهرت ... حاولت أنام بس العطش يقتل ...

غمضت عيوني ونمت للحظات .. وقعدت .. طلبت منهم الماي ..
وشفت وحده دخلت .. يمكن عراقية أو من عرب إيران
قلت لها أبي ماي ..
قالت خلاص بصب لك شووي
يالله شكثر فرحت (لعن الله إلي قتل الحسين عطشان وماسقاه الماي)

والله يجزيها ألف خير صبت لي وساعدتني أشرب ..
وسألتني وين أبوك ووين إلي معك
أتصلي عليهم يجون أو عطيني رقمهم ..

((سكتت لأني عارفه إن أبوي بيجي بعد شوي))

وقالت لي إنها جالسه بالمستشفى مع بنتها .. بنتها بعد مسويه العملية

ظليت أتأوه من ألم أنفي لاشعورياً .. أنام وأصحى على الوجع

(( لمن المتألم يعبر عن شعوره وتطلع منه كلمة آآ ,,,يحس فيها راحه وتنفيس ,,
غير لمن يكتم الوجع بداخله ))

والحمد لله يآآرب .. راح الألم إلي بالأنف ... وباقي ألم حلقي (شكلهم لوزاتي ألتهبوا)
وكان صوتي ضعيف بيالله أتكلم

قلت أبي ماي .. شربت ماي .. إلا حسيت إني بتقيأ ..
دخلت الحمام .. وفعلاً تقيأت شوية كم (كمية بسيطه) مو كثيـر

جابولي بعدها العشاء .. ما أشتهيت آكل شيء .. بس أكلت روبــه وشربت ماي

رجعوا ركبوا علي المغذي .... والحمد لله حالتي مستقره مافي ألم بالأنف
بس حييل حلقي معذبــني

وحطيت على وجهي المتنفخ كمادات ثلج

نمت ذيك الليله بالمستشفى ... باليوم الثاني الصباح
جابوا لي الفطور .. نفس الشيء ما أشتهيت آكل .. بس شربت كأس الحليب

بعدها جابت لي الممرضه بنطلون وبجامه ثانيه أبدل .. وجات بتساعدني أغير
مارضيت لها ... قلت لها بغير بدون ما أوطي راسي
وكان شعري يــابس (كأنه منكب عليه بيبسي) .. أستغربت شلون الدم وصل لشعري
بس شكل خشمي نزف كثير وقت العملية

طبعاً الورم كان كله تحت عيوني وبالخدود ..

غيرت ملابسي .. عقبها جاء الممرض ... عشان يشيل الفتايــل
((ياربي صج يوجعون .. حاريـــن .. ضغطت على نفسي وتحملت))

وعقب ماشالهم سألني تتنفسين عدل .. قلت أي الحمد لله النفس تمام

قلت حق قريبتي الإيرانيه
حلقي يألمني قولي للدكتور يكتب لي مضاد حيوي
قالت إن شاء الله

بعد ماطلع الممرض ... لبست ملابسي إستعداداً للخروج
وعطوني غرشة صغيرة فيها الجلد إلي قصوه من خشمي منقوع بمحلول
مع كمادة الثلج ...

طلعت من المستشفى ... ورجعنا للفندق .. وأحس شكل وجهي يخرع
هههه كأني مايكل جاكسون مع شكل الجبيــره واللزقات

جاء المترجم سيد حسن وجاب لي غرشتين ماي ملحي عشان أنظف الأنف واستخدمها غرغرة للحلق
مع حبوب آخذه كل 8 ساعات .. ومضاد حيوي


وأبتلشت يوم الدم تجمع بخشمي ..
قلت حق أبوي بسرعه أسعفني بأعواد أذن عشان أنظفه

ولمن أخذت المضاد الحيوي .. الحمد لله راح الألم بحلقي وتحسنت
وحتى صوتي إلي اختفى رجـع ..

الجبس كان يتعبني .. كنت طول الوقت أتسدح على السرير ..
لأن مو زين أوطي راســي










__________________
سبحان الله وبحمده ,, سبحان الله العظيم

التعديل الأخير تم بواسطة فاطمة 25 ; 20-10-2013 الساعة 02:12:24 AM
فاطمة 25 غير متواجدة حالياً   رد مع اقتباس
قديم 20-10-2013, 02:30:39 AM   #2
كــويــتــيــة بــرونــزيــة
 
تاريخ التسجيل: Jan 2011
الدولة: الأحساء - شرق السعودية
المشاركات: 587
افتراضي رد: عمليتي (عملية تجميل الأنف) عند الدكتور أفشار - مشهد / إيران

وبليله طلعت وكان الجو بارد والهواء دخل بأنفي
فباليوم الثاني وحده من الفتحات صارت تنزف بشكل خفيف

ويوم عن يوم الورم يخف ..

ظليت بالجبس الأثنين - الثلاثاء - الأربعاء - الخميس
والحمد لله الورم بدأ يخف بشكل تدريجي
ويوم الجمعه بالليل .. كان موعدي مع الدكتور .. يشيل الجبس


المترجم سيد حسن أعطانا العنوان
وقريبتي الإيرانيه وزوجها قالوا له مايحتاج تجي
خلاص أحنا نتفاهم مع الدكتور


طبعاً العيادة إلي رحتها هل مره غيـــر

كانت تنتظرنا الممرضة..... دخلت العياده وقصت الجبس ,, وشالت الخيوط
وشفت شكل الأنف ..
((أول نظره كانت نظرة إستغراب وتعجب .. بعدي مب مستوعبه الشكل))
وكان خدي اليسـار بعده متورم .. فالأنف صاعد ونازل من جهه بسبة الورم
بس ماخفت .. لأني تذكرت كلام البنات بالمنتدى .. الورم يسوي هوايــل

قالت لي الممرضة أروح أغسل وجهي وخشمي
ورحت لدورة المياه وقعدت أغسل ..

وأنا بالحمام سمعت صوت الدكتور أفشار وصــل

لمن غسلت وجهي وأنفي ورحت لهم
كان الدكتور جالس ... عطتني مرهمين
(أستخدمهم 4 مرات باليوم على جوانب الأنف مكان الغرز)

دخلت مع الدكتور داخل الغرفة .. قعد يشوف أنفي وقام يقول لأبوي كل هذا ورم
راح يصغر حجمه أكثــر ويصير حلو إن شاء الله..

وحيل فرقت أنفي .. فعلاً صار أصغر وأحلى .. مثل ما أتمنى واحلم .. الحمد لله يارب

بعدين قام يقول الدكتور لأبوي
بكتب لها (4 أبــر تشتريهم من الصيدليه) بس ترجع للبلد تاخذ أبره
وبعد 3 شهور الثانيه وهكذا .. لين يخلصون

وبكتب لها حبوب مرتين باليوم .. عشان يمنع الترسبات إنها ترجع للأنف

بعدين قال لأبوي
الحين طريقة شلون تستخدم اللزقات
طلع جوالك وصور طريقة وضع اللزقات للأنف
ومطلوب تحط اللزقات لمدة شهر .. كل لزقه تغيرها بعد أسبوع ...

وطلع أبوي الجوال وصور الطريقة

بعد ماحط اللزقات حسيت إن خشمي يجنن .. وإني صرت قمرر
ههههه .. فرحت حيل بالنتيجه ... هذا واهو متورم عجبني .. شلون إذا فـــش

وعلمني طريقة المساج المطلوبه أسويها

قلت له شكراً دكتور ..... وطلعت من العياده فرحــانه
وأنا أمشي بثقه ومستانسه من النتيجه .. الحمد لله يـــارب




رجعنا الفندق واتعشينــا .. بعدين أبوي راح للمترجم سيد حسن وعطاه حقــه
وصرت أطالع المرايه ومستانسه على النتيجه
وصاني الدكتور أستخدم الماي والملح (إلي أعطاني إياهم) وأغسل الأنف كل نصف ساعه
عشان الأوساخ كلها تنزل ومايبقى دم متجمع

سألت الدكتور أقدر أسجد وأركع عادي
قال أي عادي مافي مشكله

بس بعدي ما أقدر أسجد سجود كامل .. أحس بألم بالأنف

والحمد لله يارب .. عجبتني النتيجه وعجبني شكل الأنف
وانتظر بفارغ الصبر مرور الأيام عشان يروح الورم ويصير شكله حلووو


وفي الختام هاذي تجربتي مع الدكتور أفشــار

وفعلاً العمليه مب سهله يا بنات .. يبيلها صبـــر وتحمل .. وأكيد إنتظار النتيجه
وهي توفيق من الله سبحانه وتعالى

والحمد لله يارب .. الله لا يغيــر علي .. ويارب تستمر النتيجه حلوه والله يديمـهــا

هاذي تجربتي مع الدكتور بأمانه

وإذا بعد كم شهر راح الورم .. بحط لكم صور لأنفي قبل وبعد
عاد بنات أي وحده تفكر ترووح للدكتور تبلغني

عشان أوصيها تسلم عليه من طرفي ...

توني راجعه للبلد الليله ... ومن الحماس سدحت لكم تجربتي
رغم إني تعبانه .... بس حيييل متحمسه أكتب

خاصة إن في بنات كثار يبحثون عن دكاترة تجميل بمشهد






__________________
سبحان الله وبحمده ,, سبحان الله العظيم
فاطمة 25 غير متواجدة حالياً   رد مع اقتباس
قديم 20-10-2013, 04:16:55 AM   #3
كــويــتــيــة ذهــبــيــة
 
الصورة الرمزية jekara_maziona
 
تاريخ التسجيل: Jan 2008
الدولة: Abdalla AlMubarak ;p
المشاركات: 2,334
افتراضي رد: عمليتي (عملية تجميل الأنف) عند الدكتور أفشار - مشهد / إيران

الحمدلله على السلامه حبيبتي





تتهنين فيه يارب

ونااااطرين النتيجه :*



__________________
لے اسلوبے الخٌاص و سٓأظل •• [ دائماً ] أتقبل رأې الناقد والحَآسِد ღ●•

jekara_maziona غير متواجدة حالياً   رد مع اقتباس
قديم 20-10-2013, 09:25:04 AM   #4
كــويــتــيــة فــعــالــة
 
الصورة الرمزية am-abood
 
تاريخ التسجيل: Jun 2012
المشاركات: 304
افتراضي رد: عمليتي (عملية تجميل الأنف) عند الدكتور أفشار - مشهد / إيران

الف الحمدلله عالسلامه حمستيني ابي اشوف شكل نوزج هههههه تتهني ياقلبي



am-abood غير متواجدة حالياً   رد مع اقتباس
قديم 20-10-2013, 10:42:11 AM   #5
كــويــتــيــة فــعــالــة
 
الصورة الرمزية Jojo1000
 
تاريخ التسجيل: Aug 2013
المشاركات: 325
افتراضي رد: عمليتي (عملية تجميل الأنف) عند الدكتور أفشار - مشهد / إيران

حمد الله على سلامتك
وشكرا لذكر تجربتك استفدنا



Jojo1000 غير متواجدة حالياً   رد مع اقتباس
قديم 20-10-2013, 08:31:40 PM   #6
FANA__3
Guest
 
المشاركات: n/a
افتراضي رد: عمليتي (عملية تجميل الأنف) عند الدكتور أفشار - مشهد / إيران

الحمدلله على السﻻمه .. ومبروك النيولوك

وانا ابعد افكر اعدل خشمي بس بعد شرح تفاصيل العمليه والتجربه اللي مريتيها بعد العمليه حيل خرعتيني اسويهاا ههههه

بانتظار الصور واذا عندج سايت الطبيب يا ليت لو تحطين لنا .. واادكتور اختصاص انف واذن وحنجره وﻻ بس تجميل؟




التعديل الأخير تم بواسطة FANA__3 ; 20-10-2013 الساعة 08:34:09 PM
  رد مع اقتباس
قديم 20-10-2013, 09:39:40 PM   #7
كــويــتــيــة فــعــالــة
 
الصورة الرمزية برنسس كاتي
 
تاريخ التسجيل: Nov 2010
المشاركات: 477
افتراضي رد: عمليتي (عملية تجميل الأنف) عند الدكتور أفشار - مشهد / إيران

اااه والله اني ودي ودي اسوي انفي




انفي مسويلي ازمة في حياتي
بس اهلي معارضين ..
مبرووك عليج العملية وناطرييييييين الصووور



__________________
دعواتكم لي بالتوفيق وتيسير أموري .

اليوزر مشترك ..
برنسس كاتي غير متواجدة حالياً   رد مع اقتباس
قديم 21-10-2013, 01:13:39 AM   #8
FANA__3
Guest
 
المشاركات: n/a
افتراضي رد: عمليتي (عملية تجميل الأنف) عند الدكتور أفشار - مشهد / إيران

اﻻ صح ليش الدكتور عطاج الجلد اللي قصوه من خشمج؟



  رد مع اقتباس
قديم 21-10-2013, 12:49:00 PM   #9
كــويــتــيــة بــرونــزيــة
 
تاريخ التسجيل: Jan 2011
الدولة: الأحساء - شرق السعودية
المشاركات: 587
افتراضي رد: عمليتي (عملية تجميل الأنف) عند الدكتور أفشار - مشهد / إيران

جيكارا
الله يسلمك يــآآرب ^^
ويحقق لك كل إلي تتمنينه
وإن شاء الله بالكثير بعد شهرين أحط لكم الصور قبل وبعد

~~~~~~~~~~

أم عبود
الله يسلمك يـارب ^^
ويهنيكِ وينعم عليك بعطائه الواسـع

~~~~~~~~~~~~~~~~~~
جوجو
الله يسلمك يـارب
وماقصروا البنات إلي سبقوني للعمليه
حيل أستفدت من تجاربهم

خاصة لمن قالوا إن الخشم يكون وارم بعد الجبس
وإن الوحده مالازم تخاف

لو إني ما أدري عن هل نقطع شان عشت برعــب هههه
وقلت خشمي ماطلع عدل ... بس الحمد لله يــارب على توفيقه

~~~~~~~~~~~~~~~~

فانا
الله يسلمك يـارب ويبارك فيكِ
هههه إذا خاطرج باعمليه لاتخافين من شيء
ولازم الوحده تتحمل الوجع والمعاناة شوي
بعدين إذا حصلت على نتيجه حلووه بترتاح كثير
وبتنسى كل شيء

إما بخصوص الدكتور .. ما أظن إن عنده موقع على النت
بشووف أراسل المترجم وأسأله عن هل نقطه

وبخصوص الدكتور .. ماسألت عن هل نقطه (إذا أختصاصه أذن وأنف وحنجره)
أو فقط تجميـل .. لكن أغلبية أطباء إيران يجمعون بين الأثنين

~~~~~

فانا
أهلاً وسهلاً
بخصوص سؤالك (ليش الدكتور عطاج الجلد اللي قصوه من خشمج؟)

عطاني إياه عشان أشوف الكمية إلي قصها من خشمي شكثر
وعشان لو حبيت أحتفظ فيه للذكرى .. هههههه

لأن بعض الأطباء يحبون يسوون هل حركه




لو شالوا اللوزات أو اللحميه يحطونها بغرشة مع محلول


~~~~~~~~~~~~~

آخــر أخباري
الحمد الله فتحات الأنف الآن نظفوا وماصار يطلع منهم دم
ومواضبه على غسلهم باماي والملح إلي عطاني إياه الدكتور
بس لمن أعمل مساج للخشم ...
أسفل الأرنبه مكان مافكوا الخشم والخياط
يطلع دم فاتح شووي

والجانب الأيمن من الأرنبه اختفى أثر الغرز
أما اليسار باقي أثر بسيط ~~~
والحمد لله مواضبه على إستخدام الكريــم


~~~~

والآن أقدر أسجد طبيعي جداً .. مافي أي آلام
أو ضغط على الأنف

أمس رحت العياده واخذت أول أبــره
(لازم تكون بالوريد يعني بالمؤخره)

وبعد 3 شهور آخذ الأبره الثانيه / ويبقالي أبرتين

هاذي الأبر فوائدها
إنها تمنع تكون الأنسجه داخل الأنف

~~~~

والله يحقق لكم كل إلي تتمنونه يــارب




__________________
سبحان الله وبحمده ,, سبحان الله العظيم
فاطمة 25 غير متواجدة حالياً   رد مع اقتباس
قديم 22-10-2013, 09:53:43 AM   #10
كــويــتــيــة ذهــبــيــة
 
الصورة الرمزية غاده بنت وليد
 
تاريخ التسجيل: Oct 2008
الدولة: njd al a7bab
المشاركات: 1,305
افتراضي رد: عمليتي (عملية تجميل الأنف) عند الدكتور أفشار - مشهد / إيران

..~

ما شاء الله ان شاء الله يخف الورم وتنبسطين اكثر

والحمد لله علا سلامتك..~




__________________
As Long As You Love me .. .. ..
~
غاده بنت وليد غير متواجدة حالياً   رد مع اقتباس
قديم 22-10-2013, 02:14:35 PM   #11
كــويــتــيــة ذهــبــيــة
 
الصورة الرمزية مكنتوشه
 
تاريخ التسجيل: Jul 2007
المشاركات: 1,298
افتراضي رد: عمليتي (عملية تجميل الأنف) عند الدكتور أفشار - مشهد / إيران

ما شاء الله الحمدالله على سلامتج





صبرتي ونلتي



__________________
مكنتوشه غير متواجدة حالياً   رد مع اقتباس
قديم 23-10-2013, 01:19:38 AM   #12
كــويــتــيــة ذهــبــيــة
 
الصورة الرمزية فطمطم
 
تاريخ التسجيل: Mar 2008
الدولة: dubai
المشاركات: 1,066
افتراضي رد: عمليتي (عملية تجميل الأنف) عند الدكتور أفشار - مشهد / إيران

الف الف مبرووووووووووك والحمدالله على السلامه



فطمطم غير متواجدة حالياً   رد مع اقتباس
قديم 23-10-2013, 01:34:09 AM   #13
كــويــتــيــة بــرونــزيــة
 
تاريخ التسجيل: Jan 2011
الدولة: الأحساء - شرق السعودية
المشاركات: 587
افتراضي رد: عمليتي (عملية تجميل الأنف) عند الدكتور أفشار - مشهد / إيران

غاده ومكنتوشه وفطمطم





الله يسلمكم يارب .. هذا إعلان للمستشفى بعد







__________________
سبحان الله وبحمده ,, سبحان الله العظيم
فاطمة 25 غير متواجدة حالياً   رد مع اقتباس
قديم 27-10-2013, 01:00:21 AM   #14
كــويــتــيــة بــرونــزيــة
 
تاريخ التسجيل: Jan 2011
الدولة: الأحساء - شرق السعودية
المشاركات: 587
افتراضي رد: عمليتي (عملية تجميل الأنف) عند الدكتور أفشار - مشهد / إيران

بنات بكرة الأحد اكمل اسبوعين من سويت العمليه
والحمد لله النتائج طيبة إلى الآن ...

أمس جلست مع خالاتي وخوالي
وقعدنا نسولف عن عمليات التجميل
وحيل متشوقين يشوفون وجهي بعد كم شهر
لمن تروح الأورام كلها ويطلع شكل الأنف




((خاصة إن خشمي بعده ملزق,,
اللزق لمدة شهر استخدمهم ... حتى أمي مابعد تشوف شكله))

هههه عاد ضحكت على سالفة مريم وفاتن

هذولي ثنتينهم يبون يسوون عملية تجميل بالأنف

مريم سافرت وسوت العمليه
يووم رجعت وشافت فاتن خشمها
ووجها المبقع من آثار العملية
خافت فاتن وقالت مستحيل اسوي العمليه .. اموت ولا اسويها

وبعد مرور سنه كامله .. صار خشم مريم يجنن
ففاتن غيرت وجهة نظرها وعلى طول جهزت نفسها للعملية

~~~~~~~~~~~~~~~

فأي وحده خاطرها بالعملية لازم تكون صبوره وتتحمل
لأن النتيجه ماتظهر بين يوم وليله .. وأكيد مافي عمليه سهله

الحمد لله مرتــاحه ... واشكر ربي إني سويتها

واكيييد انتظر الأيــام عشان يطلع شكله وترجع حياتي طيبيعيه
اطلع من البيت واروح واجي

الليلة عرس ولد عمتي ماقدرت احضرة




__________________
سبحان الله وبحمده ,, سبحان الله العظيم
فاطمة 25 غير متواجدة حالياً   رد مع اقتباس
قديم 27-10-2013, 01:30:11 AM   #15
كــويــتــيــة بــرونــزيــة
 
تاريخ التسجيل: Jan 2011
الدولة: الأحساء - شرق السعودية
المشاركات: 587
افتراضي رد: عمليتي (عملية تجميل الأنف) عند الدكتور أفشار - مشهد / إيران

صورتي بعد العلمليه .. وبعد نزع الفتايل





إن شاء الله بعد شهرين أحط لكم صورة لشكل الأنف

قبل وبعد بإذن الله






__________________
سبحان الله وبحمده ,, سبحان الله العظيم
فاطمة 25 غير متواجدة حالياً   رد مع اقتباس
إضافة رد

اكثر الكلمات بحث
(عملية, مشهد, أفشار, الأنف), الدكتور, بدآخل, عمليتي, عند, إيران

أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML متاحة
Trackbacks are متاحة
Pingbacks are متاحة
Refbacks are متاحة



الساعة الآن حسب دولة الكويت : 04:35:38 PM.